Getur heilsa verið dyggð?

Heilsan er oft nefnd þegar Íslendingar eru spurðir um sín helstu lífsgildi. Heilsa er strangt til tekið ekki dyggð, mannkostur eða siðferðilegur eiginleiki eins og heiðarleiki, traust, sjálfsagi og hugrekki. Gott er þó að keppa að góðri heilsu með því að stunda heilbrigt líferni. Við getum forðast leti og hreyfingarleysi og gætt að mataræði.

Í Lífshlaupinu sem nú stendur yfir segir í kynningu: „Hollur og fjölbreyttur matur, hæfilegt magn og reglulegar máltíðir eru grundvöllur góðra matarvenja. Góðar matarvenjur eru aftur undirstaða þess að fólk hafi orku og löngun til þess að hreyfa sig.”

Auðvelt er að tengja nokkrar dyggðir við heilsuna eins og nægjusemi, sjálfsaga og einnig það að hafa hemil á sér og taumhald. Það er með öðrum orðum hægt að bæta heilsuna með því að efla nokkrar dyggðir og dempa nokkra ókosti.

Mörg sem hafa í góðri trú vanið sig á að neyta áfengis hafa vaknað upp við þær staðreyndir að alkóhól fer bæði illa með sál og líkama. Áfengi eykur til að mynda líkur á sjö tegundum krabbameina, hefur slæm áhrif á heilavefinn, letjandi áhrif á vitræna getu, truflar skapið, eykur líkur á slysum og fækkar lífárum. Það eru því margar ástæður til að skipta yfir í vínlausan lífsstíl fyrir eigin tilstilli.

Það er gefandi að hætta fyrri breytni og endurnýjast í anda og hugsun. Það er að öðlast hugarfar byrjandans. Það er jafnspennandi verkefni að hætta einhverju gömlu eins og að byrja á einhverju nýju, að venja sig af ávana og taka upp nýjar venjur. Það opnar nýja vídd í tilverunni. Áfengi er ávanabindandi efni. Það er gott að gefast endanlega upp á því og taka ákvörðun um að vera frjáls frá því. Góð byrjun er að taka þátt í Edrúar febrúar.

Getur heilsa verið dyggð?

Það er gott að tileinka sér líferni sem bætir heilsuna, bæði með því að sækjast eftir æskilegum þáttum og forðast það sem fer illa með líkama og hugarstarf. Einstaklingur með of háan blóðþrýsting, óreglulegan hjartslátt og lélegan svefn fer til læknis sem segir: „Besta ráðið til að bæta stöðuna er að snarhætta áfengisneyslu.”

Skjólstæðingurinn gerir það og stenst bæði félagslegan þrýsting í samfélagi sem er hlynnt áfengi og líkamlegan þrýsting því alkóhól er ávanabindandi efni. Hann fer svo að hreyfa sig og borða hollt. Þetta getur fallið undir heilsusamlegt líferni.

Heilsuefling og forvarnir eru hluti af allri þjónustu heilbrigðiskerfisins og miða að því að viðhalda og bæta heilbrigði fólks sem og koma í veg fyrir sjúkdóma eins og kostur er. „Forvarnir eru grundvöllur góðrar lýðheilsu og vinna þarf heildstætt með helstu áhrifaþætti heilbrigðis í þeim tilgangi að bæta heilsu, líðan og lífsgæði fólks” segir í drögum að stefnu í áfengis- og vímuvarnarmálum til 2035.

Að neita sér um áfengi er því mjög góð forvörn

Svarið við spurningunni Getur heilsa verið dyggð? Er að hægt sé að bæta heilsuna markvisst með því að rækta dyggðir eins og hófsemd, hugrekki, sjálfsaga ásamt harðfylgni sem er dugnaður og að fylgja einhverju fast eftir. Sú manneskja sem er of lin við sjálfa sig og nær ekki að stappa í sig stálinu, þarf að læra harðfylgni.

Það er svo auðvelt að láta berast af leið. Við þurfum bæði kraft og einbeitingu ef ætlunin er að ganga út úr þoku hugans á ákveðinn áfangastað. Við þurfum áttavita, kunnáttu, úthald.

Það kostar hugrekki að vera öðruvísi, vera eina manneskjan í hópnum sem ekki neytir áfengis og brjóta í bága við vínmenninguna sem ríkir í samfélaginu. Þrýstingurinn eykst og spurningaflóðið hellist yfir. Hugrekki þarf til að hopa ekki á hæli undan sefjun fjöldans. Harðfylgni og hugrekki eru nátengd gildi, ef við nýtum okkur kraftinn sem þau geyma, þá er mun líklegra að við náum ákjósanlegum árangri.

Gleðin felst í því að standast eitrið en ekki í því að láta undan því.